A C.D Portas Xadrez sumou a súa derradeira victoria na Liga contra o equipo vilagarciano do Clube Fontecarmoa "Limpezas all cleaning" por un contundente 3 a 1. Como novidade, o debut de Antonio en Liga, conseguindo unha fácil victoria. Bárbara e Héctor gañaban sen dificultades nas súas respectivas mesas, pero non así Brais, quen tras levar en todo momento unha igualdade no xogo contra a actual campiona galega Sub-10, Andrea Dorado, un despiste no final da partida entregáballe a mesma á rival.

Ás poucas horas transcorridas, o delegado do Clube A Lama "A" poñíase en contacto ca C.D Portas para informar do seu desastre na xornada tras perder por 3 a 1 contra o equipo da Estrada. Unha vez máis, con medio punto de máis conseguido, C.D Portas tería o ascenso garantido á Segunda división, pero a sorte non estivo cos de Portas, e tras empatar a puntos con A Lama, o sistema informático de desempate empregado non nos favorecería, dándolle o ascenso ós do penitenciario. É de resaltar este sistema de desempate ("Sonnen"), que contando o Portas con 7 victorias de equipo, 0 empates e 1 única derrota, perde no mesmo contra un equipo con 5 victorias, 1 empate e 2 derrotas: números incribles!! A explicación dada, tras previa "reclamación" á Federación Galega de Xadrez, atopábase nos 3 puntos conseguidos polos da Lama contra o líder final CXF Sold Out. Dito sistema de desempate ten máis en conta a dificultade de cada punto xogado en cada taboleiro de xogo segundo a posición final de cada un dos equipos na táboa, que unha victoria global de equipo contra calquera outro equipo. Tampouco pondera que entre A Lama e C.D Portas os derrotados foran eles por un 1.5-2.5

En fin... cousas do regulamento!! Ó final, unha boísima tempada na Liga Galega en 3ª División con un único pinchazo que pagamos máis que caro na pelexa polo ascenso á Liga Galega en 2ª. A C.D Portas tivo a súa oportunidade, pero finalmente o ascenso, que para nada era o obxectivo ó inicio da tempada non chegou. Xadrez Portas despidese da Liga, por tanto, nunha excelente 3ª posición empatados a puntos co 2º, A Lama "A". Felicidades ó equipo do Fontecarmoa Sold Out polo seu extraordinario final de Liga, así como ós da Lama por conseguir o ascenso xunto cos vilagarcianos. O vindeiro ano volveremos tentalo !!

Duro golpe o recibido o sábado na xornada de liga galega desputada en Portas fronte o Clube “Sold Out” de Fontecarmoa.

O noso equipo, líder ata o momento con 2 puntos de vantaxe sobre A Lama “A” e “Sold Out”, non foi quen de aguantar a presión e perdía por primeira vez na liga de maneira contundente: 0 a 4. Bastábanos calqueira outro resultado para manter as opcións de ascenso á Segunda División, pero a falta de fortuna e saber estar en momentos tan cruzais coma éste, foron os responsables do sucedido. O equipo de Vilagarcía sabía da importancia do encontro, e así o demostraban nos 4 taboleiros de xogo. A diferencia fundamental atopouse na falta de madurez dos nosos rapaces, quizáis pola súa curta idade, máis na profundidade de cálculo nas xogadas realizadas. Mentres os vilagarcians examinaban con maior atención cada un dos seus movementos, tanto en ataque como en defensa, xogadores como Sandro e Pablo consumían menos tempo no reloxo á hora de plantexar fronte. Alessandro na mesa 3, tras xogar con propiedade durante case toda a partida, caía nunca trampa do rival ó capturar un peón “envelenado”, sendolle atrapado o cabalo e a iniciativa de cara ó final da partida. Se a análise ó respecto fora outra, quizáis non "picara" nesta xogada de picardía plantexada polo rival. Bárbara, pola súa parte, aguantaba as envestidas do seu contrincante na primeira mesa, pero chegaba un momento no que a colocación da torre inimiga en sétima fila, destrozaba todo posible intento por frear a un xogador vilagarcian con 1728 de puntuación ELO.”

Dura derrota, nun momento clave da tempada, no que nin os máis optimistas contaban ca posibilidade de que este equipo chegara pelexando por un ascenso, que aínda é posible pero que está máis difícil.

Nova victoria do XADREZ PORTAS ante o equipo PORTO DE VILAGARÍA pertencente o Clube de Xadrez Fontecarmoa.

Arrancaba a C.D Portas no papel de visitante para xogar contra un equipo de moi xoves xogadores. Pablo na mesa 4 remataba en tan só 10 minutos de xogo. O seu compañeiro Alessandro dominaba en todo momento a partida no taboleiro 3, pero quizáis por excesiva confianza deixaba que o seu pequeno rival lle plantexase un ataque dobre; aínda así, a vantaxe de coñecemento e experiencia era demasiado ampla coma para que houbese sorpresas no resultado.

Héctor, na mesa 2 de xogo, mantivo máis dificultades para gaña-la partida, habendo incluso un momento no que lle puideron levar peza nun mal cálculo nun posible cambio de damas levado a cabo polo noso xogador. Avanzada a partida, Héctor conseguía arrebatarlle torre ó rival, encamiñando dende entón a iniciativa total e absoluta da partida. A C.D Portas sumaba así 3 puntos dos 4 totais do encontro, pero a novidade deste tivo lugar na mesa 1 de xogo. Bárbara coñecía por primeira vez na Liga a derrota; sentábase diante dela un pequeno pero gran xogador de 11 anos: Jorge Bayón. Tras conducir a partida a posicións derivadas do cambio de peóns centrais nas liñas de xogo da defensa francesa, e arriscando cun sacrificio de alfil en 'h7' xa ben entrada a partida, foi quen de, en 3 horas e 20 minutos de xogo, pelexar o final da partida cunha vantaxe de 2 peóns, que correctamente soubo avanzalos para conseguir a promoción dun deles e así a consecución da partida.

O noso equipo, quen conseguíu ata o momento gañar tódolos encontros disputados, colocase como novo líder do grupo con 18.5 puntos perseguido de preto polo CXF "Sold Out" e o Centro Penitenciario da Lama "A", a 2 puntos. É, por tanto, unha pelexa a morte entre estes tres equipos polo ascenso á Liga Galega en 2ª Division, e por se fora pouco, o sábado que ven enfrontamento cun rival directo, o equipo de Vilagarcía CXF Sold Out". Este enfrontamento favorecerá á Lama "A", xa que pelexamos entre nós puntos directos, e é de agardar que este equipo gañe os 8 puntos restantes que lle quedan por desputar debido ós seus doados enfrentamentos de aquí ó final da liga. "A LIGA está que arde ..... e soamente poden ascender dous equipos" !!

Experiencia inolvidable no Centro Penitenciario da Lama.O sábado, día 20 de Febreiro, o noso equipo visitaba ó lider Centro Penitenciario A Lama “A”. Mantiña ata o momento dous puntos de diferencia de cara a nós, iso sí, cunha xornada de menos pola súa parte, xa que aínda teñen que descansar.

A expectación creada arredor deste enfrontamento era enorme; pola banda deles, os seus xogadores agardaban esta loita con moitas ganas, xa que se vían ante os taboleiros os dous primeiros da liga, rivais directos de cara ó ascenso á 2ª División. Gañaban ata entón a totalidade dos seus encontros, lembrando a victoria por 3 a 1 ante un duro rival como era CXF “Sold out”.

Pola nosa parte, entraban en xogo outros aspectos á marxe das dificultades propiamente deportivas; a incertidume para os nosos cativos tiña o seu peso. Sabiamos que os nosos rivais eran internos do centro, e aínda que se lles explicou ós rapaces con anterioridade que as cousas non son como pintan dende fóra,  influídos case sempre polos medios televisivos e do cine, era imposible pretender que os seus nervios non estivesen presentes.

Remataba a primeira das partidas na mesa nº4, defendida por ALESSANDRO. Foi dono absoluto en todo momento da partida, conseguindo en breve levarlle a dama ó rival tras unha bonita descuberta con xaque ó rei. A partires de entón, só restaba aminorar o material do taboleiro para conseguir o xaque mate. Portas adiantaba así, ós ollos do seu adestrador, o marcador con 0 a 1.

As tres primeiras mesas eran dun nivel moi superior á mesa 4 defendida na Lama por un rival italiano.

Tódolos rivais cifraban unha idade entre 40 e 50 anos, aproximadamente.

Pasaba tempo, e xurdían complicacións de posición para SANDRO  na mesa nº3. O seu rival non permitiu en ningún momento darlle máis comodidade de desenrolo ás pezas cabalgadas polo xogador de Portas.

Mentres tanto, HÉCTOR, na mesa nº2 de xogo, deixaba avanzar a partida con tranquilidade, sabendo cambiar no momento oportuno as pezas no medio xogo. O seu rival íase incomodando pouco a pouco, sabedor quen de que a partida comezaba a inclinarse do lado do pequeno. Unha vez se adentraron na fase do final, o de Portas, facendo uso da súa experiencia neste xogo, definiou con total superioridade a partida, facendo que o seu rival inclinara o seu rei sobre o taboleiro, recoñecendo a derrota e dándolle a naroboa a Héctor polo seu xogo despregado. O encontro, pois, marcaba 0 a 2 para os de Portas.

Volvendo á partida de Sandro, o interno da Lama sacáballe vantaxe de material e de ataque máis que evidente, dándolle a victoria ó xogador local.1 a 2 no marcador!!

E que ocorría no primeiro taboleiro?

Os de A Lama, espectantes ca partida de BÁRBARA, sabían que o resultado da mesma definiría o desenlace global do encontro. O xogador da Lama mandaba claramente no seu equipo, amosando unha tranquilidade aparente e unha análise máis que respirable en cada un dos movementos da partida.

Foi unha partida lenta e desputada, de gran colocación por ambos bandos. A iniciativa das brancas por xogar primeiro facía que Bárbara estivese á defensiva en case todo momento. Tivo unha oportunidade de cambiar este carácter nunha xogada mediada a partida entregando calidade por un cambio de torre por alfil, gañando a continuación dous peóns máís ataque continuado. Bárbara quixo ser prudente e non arriscou. Tras forzar un cambio de damas obrigado ó seu rival, a nosa xogadora conseguía respirar finalmente trala agobiante presión do da Lama pola disposición de ataque das súas torres dobradas na única columna aberta da partida.

Pasadas xa dúas horas de xogo, encamináronse ámbolos dous a un igualado final, rematando a partida en táboas tras dúas horas e 45 minutos.

Xesto final do seu rival de cara á nosa xogadora cun apretón de mans. PORTAS conseguía derrotar a un duro rival por 1.5 a 2.5 puntos.

XADREZ PORTAS sitúase pois a 1 punto da Lama, cunha xornada de menos, o que quere dicir que se os nosos puntuan favorablemente na xornada de descando deles, conseguiría colocarse de primeiro con tódolos encontros gañados ata o momento, dando un paso de xigante ó posible ascenso por primeira vez na historia de Portas á Liga Galega en 2ª División. Restan 3 encontros, todos eles contra equipos do Clube de Xadrez Fontecarmoa, así que haberá que estar atentos!!

Os internos da Lama, así coma o seu delegado e o seu adestrador, felicitaban ós de Portas polo éxito acadado, recoñecendo a enorme calidade de xogo nunha excelente canteira de xogadores como son os nosos.

Favorable pois esta experiencia, que estamos seguros nunca esquecerán os xogadores de XADREZ PORTAS de cara ó futuro.

NORABOA A TODOS ELES!!

"C.D.PORTAS XADREZ suma unha nova victoria de equipo ante a ESCOLA MUNICIPAL DA ESTRADA (3 a 1). O equipo visitante non presentaría a un dos seus xogadores no 4º taboleiro de xogo. As nosas cores eran defendidas por Bárbara, Juan e Brais, quen debutaba onte sábado en Liga Galega en 3ª División; un mal cálculo na xogada 19 dáballe calidade de vantaxe ao seu rival, que sumado a un erro importante na derradeira fase do xogo concedíalle a partida á Estrada. Polo demáis, Brais levaba a partida moi favorablemente, posto que levaba peza de vantaxe tras unha correcta apertura. Bárbara remataba co xogador da mesa 1 en tan só 15 movementos, dándolle por tanto á partida a consideración xadrecística de "miniatura". Juan conseguía recuperar unha partida que levaba perdida por tamén un mal cálculo nos cambios propios do medio xogo. Unha xogada táctica de picardía cambiaría o carácter da mesma, facéndose ó final coa victoria. O equipo mantense na zona alta da táboa por debaixo do líder, o Centro Penitenciario da Lama, con quen nos enfrentamos na próxima xornada dentro de dúas semanas, dado o parón de xogo debido á celebración dos Campionatos Galegos Sub-14 e Sub-18 do 13 ó 16 de Febreiro."

Terceira victoria consecutiva dende os comezos da Liga Galega en 3ª División, esta vez por un contundente 0-4 fronte a un equipo dos de maior dificultade no grupo ata o momento, "Academia Copérnico", pertencente á prestixiosa Escola de Xadrez KARPOV, de Pontevedra. A súa posición na táboa clasificatoria non é representativa, posto que na primeira xornada de liga non presentou a dous dos seus xogadores, e na dúas descansou. Xogaron pola nosa parte HÉCTOR na mesa 1, SANDRO na 2, ALESSANDRO na 3 e PABLO na 4. As victorias foron chegando cada 30 minutos, xa que Alessandro remataba en tan só media hora de xogo, e o seu compañeiro Pablo en 1 hora, ámbolos dous cunha enorme superioridade no xogo plantexado. Os que máiss tiñan que "cocer" as súas partidas serían Sandro e Héctor, rematando en hora e media e dúas horas, respectivamente. Os seus rivais abandonaban a partida cun noble xesto de man entregado ós nosos xogadores, recoñecéndolles así o seu mellor xogo. Tarde triunfal, polo tanto, onte sábado en Pontevedra, e onde quedou de manifesto unha vez máis, que a idade no xadrez non é nada determinante. Os nosos souberon estar en todo momento, amosando unha calidade de xogo moito máis que respetable."

O equipo de xadrez debutou este sábado en 3ª División. Desprazouse ata Pontevedra para xogar contra EXP "C", equipo pertencente ó Clube Xadrez Pontevedra. Xadrez Portas venceu por 1 a 3, con Bárbara no taboleiro 1 de xogo, Héctor no 2, Alessandro no 3 e Pablo no 4. A superioridade de xogo foi evidente nos 3 primeiros, non así no último defendido por Pablo Gonzálvez. Tras unha correcta apertura, o noso xogador non foi quen de aproveitar a vantaxe inicial da súa posición, gañando terreo ó seu contrincante a medida que avanzaba a partida. De estar algo máis fino, pois Pablo non amosou para nada o seu nivel de xogo, a partida inclinaríase para Portas, posto que o seu rival, de bastante máis idade ca el, non tiña experiencia de xogo nos finais de partida."